Italianu pioniere de sos robots pro sa istatzione lunare

Isperimentados robots in s’Istatzione Ispatziale Internatzionale, castiende a sa Luna

Faeddant italianu sos robots chi ant a agiudare sos astronàutas de s’Istatzione Ispatziale Internatzionale (Iss) a esecutare carchi esperimentu in cunditzione de microgravità e a tènnere in suta de controllu e compudu s’istatzione orbitale e chi rapresentat sa base in sa cale ant a bènnere isvilupados sos robots destinados a sa benidora istatzione orbitante a fùrriu a sa Luna (Lunar Orbital Gateway). De s’equipe chi l’at pensadu e costruidu, difatis, faghet parte fintzas un’a beru giòvanu ingegneri aerospaziale napuletanu chi tra pagu compierà 30 annos: si mutit Roberto Carlino e est a prenu tìtulu cumponente de su progetu Astrobee.

Com’est nòdidu sos robots ant a cobèrrere unu ruolu significativu in sa torrada de s’òmine in sa Luna e de oramai bator annos e mesu Roberto traballat in su tzentru Ames de sa Nasa in Califòrnia, pretzisamente a Sud de San Francisco, in sa famada Silicon Valley. Cue, paris cun un’iscuadra assentada dae una ventina de collegas, at progetadu tres de custos robots chi si mutint Bumble, Honey e Queen.

Duos sunt istados afilados e unu, Bumble, at urtimadu dae carchi chida, gràtzias a s’astronàuta Anne McClain, sas proas preliminares in s’istatzione ispatziale. Su làntziu de su de tres est prevìdidu pro trìulas. Sos campos de isperimentatzione in cale ant a pòdere èssere impreados sunt variegati, comente a robotica, propulsione e abistesa artifitziale.

Roberto, fìgiu e frade de mèdicos, at prefertu, cun sutzessu, unu àteru pranu de istùdios. A s’Universidade Federicu II de Nàpoli s’est laureadu in ingegneria aerospaziale cun 110 e lode. Posca sa passione sua s’ispintu finu in s’isponda orientale de sos Istados Unidos de Amèrica, laddove ogni ingegneri cun unu mìnimu de codìssia diat bòlere isbarcare. Roberto, però, at brusiadu sas tapas e oras est in manera istàbile impinnadu in sos progetos aerospaziali de sa Nasa.