Maurizio Sale espertu de trasportos linguisticos

Sa Limba Sarda Comuna unu istandard poi una persone sarda comuna chistionat Maurizio Sale.

So amigu de custu istandard ùnicu, ca pro mene – narrat Maruzio Sale – est s’ùnica manera pro si nch’essire dae su prùere e dae sa nèula chi, unos cantos inimigos de una limba normale, sunt pesende cada die. So inimigu, imbetzes, de sos argumentos setàrios, istèrridos petzi pro imbelare su sentidu de sa gente che a mie e chi, che a mie, si nche diat chèrrere istesiare dae su malu sentidu.

No est beru chi sa LSC tenet unu babbu barone o ditadore chi cheret impònnere su credo suo. Chie lu creet e chie lu narat, pro mene, tenet problemas mannos a istare in su mundu (non tenet ideas o, si las tenet, sunt malas ebbia).

Ammentende·mi su chi naraiant sos latinos, pro mene sa LSC babbos nde tenet medas, ma mama una e una ebbia: sa Sardigna. Ùnica est s’ìsula nostra e ùnica est sa Limba sua, comente ùnica est sa tela de unu pintore fintzas si milli sunt sos colores e sas formas. No est cosa nàschida in duas dies, custa. Annos e annos b’at chertu pro nche cròmpere a custu resurtu. Como, su dovere nostru devet èssere a l’impreare e sa punna nostra a l’amparare.

Sena una limba a norma non bi podet àere autonomia, non bi podet àere sentidu polìticu locale non bi podet àere autonomia culturale. Lassamus pro como a una banda s’indipendèntzia. Ca pro èssere indipendentes in sa vida, cun su traballu e cun sa cultura tocat in antis a èssere indipendentes cun sas ideas. E sas ideas pro nche cròmpere a totue, devent èssere iscritas e a norma. B’at pagu ite li girare a in tundu, ca in s’ora chi medas si nche colant tzarrende e ingiurgende, b’at gente chi traballat e produit in sardu e custu est su chi contat e chi arrumbat.

Sa chistione como est: a nos interessat a nos intèndere unu pòpulu chi punnat pro sa Limba sua che a una forma de crèschida sotziale, culturale e econòmica o puru nono? Totu su restu est nèula e prùere a ogros.

Tzertu chi sa LSC no est perfeta, custu nemos lu creet. Est de megiorare custu est beru, ma onni cosa a printzìpiu paret cosa fea. Cun su tempus e s’istima totu nche crompet a ue nche devet cròmpere.

Deo nch’apo collidu su sardu dae babbu e dae mama, dae mannoi e dae mannai, duncas pro mene su sardu est sa limba de su coro, de sas lusingas, de sas brigas e de sa paghe. Sa LSC est sa norma chi nos permitit de nche colare dae su pensamentu a su pabiru e de nche colare dae custu a intro de nois, cun sa matessi fortza. Est duncas gosi chi nche podimus issèndere su chi pensamus a totue. Chi siat in logu de iscola, in logu de ufìtziu,in s’ospidale, in sa polìtica e fintzas in domo.

So amigu de sa LSC ca tenet unu lèssicu lìberu e ca est custa sa manera prus galana de nche giùghere a totue su sentidu meu, pro sèriu chi siat o befulanu. E no est beru chi nche furat cosa a sos limbàgios de sas biddas. No nche furat nudda a nemos, e sos dialetos la podent petzi agiuare a si fàgheret a manna. Duncas fintzas si unu diat iscrìere “marracoco” a sa durgalesa e un’àteru imbetzes iscriet “piricoco”, istade prus chi non seguros chi ambos ischint de su chi sunt faeddende. Sena duda peruna!