Una motzione in favore de su bilinguismu in onni Comune

Sa Corona de Logu presentat una motzione pro impreare su sardu in sos Comunes

“Adotamus in Cussìgiu comunale una motzione in favore de su bilinguismu, pro impreare su sardu in onni Comune”. Est sa proposta fata dae sa Corona de Logu (assemblea de sos amministradores indipendentistas sardos) chi l’at bogada a campu oe 21 de freàrgiu 2019, in ocasione de sa Die Internatzionale de sa Limba Materna.

“Est de importàntzia primària pro nois chi s’impreu de sa limba sarda crescat, ca est sa limba mama nostra” ispiegat Davide Corriga sìndigu de Baulau a nùmene de sos rapresentantes de s’assemblea.Sa motzione l’ant presentada in sos Cussìgios de Aristanis, Baulau, Biddanoa ‘e Forru, Gàiru, Iscanu, Macumere, Mòguru, Pabillonis, Samugheo, Serramanna, Serrenti, Sìmaba, Simaghis, Terraba, Ussaramanna.”Aprovada sa motzione, su Presidente de su Cussìgiu comunale s’impignat a abèrrere in sardu onni riunione de su Cussìgiu comunale; sa Giunta s’impignat a publicare sas delìberas siat in sardu siat in italianu; sos impiegados s’impignant a si relatzionare in sardu cun sa gente e cun sos collegas” ispiegat sa Corona de Logu, chi at a dare a sos cumponentes unu modellu de mortzione e de sos àteros documentos chi serbint.

Cun s’ispera chi sos Comunes chi leant custu impignu siant semper de prus, ammentamus chi sa Die de sa Limba Materna l’at istituida s’Onu in su 1999 pro no ismentigare sos istudiantes de s’Universidade de Dacca chi su 21 de freàrgiu de su 1952 sunt mortos pro manu de sa politzia, manifestende pro chi su bengalesu limba issoro esseret reconnotu comente segunda limba natzionale de su Pakistan.