SARDU, un’aplicatzione sarda chi permitet Multiboot

Unu programàriu pro Windows e Linux chi permitet  de  creare sistemas Multibootlive USB

SARDU (Shardana Antivirus Rescue Disk Utility) est unu programàriu pro Windows e Linux chi permitet  de  creare sistemas Multiboot live USB o Live DVD cun Discos antivirus pro sarvare sos datos, regortas de  Utilidades e Discos de recùperu, Live CD Linux, Windows PE; si podet impitare fintzas pro fàghere un’installatzione de Windows sena bisòngiu de masterizare su CD o su  DVD, ma impreende petzi una crae USB o unu discu tostu USB.

Sigomente tenet un’”iscarrigadore” integradu, SARDU podet iscarrigare sos live CD suportados: bastat a incarcare in su pulsante giustu. O in càmbiu si li podet dare  su documentu .iso chi est istadu iscarrigadu in antis. Si b’at iso non presentes in sa  lista, si podent manigiare impitende  sas funtziones  extra in sa  setzione giusta.

Sas .iso ant a èssere unidas in unu suportu USB o DVD ùnicu. In SARDU b’at una funtzione  pro masterizare sas .iso.
Sas figuras  .iso e sas USB multiboot chi s’otenent si podent controllare cun QEMU integradu.

COMENTE FUNTZIONAT

SARDU podet creare unu Multiboot Live USB o Live DVD chi si podet allùghere cun unu menù de sèberu lestru dae ue si podet aviare su programàriu seberadu. S’iscarrigamentu de sas .iso si podet ativare incarchende in su pulsante giustu. Su sèberu  de sas  .iso de manigiare si faghet incarchende in una  casella de controllu.
A differèntzia de UNetbootin,  SARDU podet manigiare e creare unu suportu ùnicu chi si podet aviare cun prus de unu  Live CD.
Cun unu mòdulu  chi si narat “barrosu”,  podet manigiare  sas installatziones  de Windows Vista, Windows 7, Windows 8 e Windows 10 in una pinna USB FAT32 ùnica .

ITE BI CHERET PRO L’IMPITARE

• Microsoft Windows 2000/Windows XP/Windows Vista/Windows 7/Windows 8/WIndows 10.
• Linux
• Una connessione Internet a banda larga pro iscarrigare su documentu .iso de sa distributzione (si no est chi unu est impitende una figura .iso iscarrigada in antis).

Ligàmenes:

• giassu ufitziale de SARDU, su sarducd.it.
• giassu ufitziale de SARDU Pro, su sardu.pro.
• forum ufitziale de SARDU, su sarducd.it.
• Elaboradore guastu? Arribbat “SARDU”, su sistema prus impitadu in su mundu