Folk de 3 Continentes, torrat Is Pariglias

A Maracalagonis, Carluforti, Assèmini, Foghesu e Pula su fèstival Pariglias

Sa maja de sas dantzas populares de Bolìvia, Romania, Ecuadòr, Kazakhstàn e Sardigna pro chimbe seradas a s’insegna de su cunfrontu tra culturas diversas, in un’iscàmbiu fatu de mùsica, colores e sentidos. De giòvias 25 a martis 30 trìulas torrat Is Pariglias, fèstivals de sas dantzas identitarie organizadu dae s’assòtziu culturale Tzitade de Assèmini.

Pro sa 43/a editzione, chi ripropone sa fòrmula “Ethnodanza in Tour“, su fèstival at a Tocare Maracalagonis, Carluforti, Assèmini, Foghesu e Pula, cun duos laboratòrios de dantzas identitarie e de coghinas traditzionales chi s’ant a tènnere imbetzes a Assèmini. “Comente a semper, apamus arratzadu grupos de livellu a beru artu chi, paris cun sas capatzidades coreografiche e musicales, ant printzipiadu unu percursu de istùdiu de sas culturas populares issoro, riproponendole in manera fidele e rigorosa”, ispiegat sa diretora artìstica de su fèstival Maria Carmela Deidda.

Protagonistas su grupu Andanzas Ecuadòr (cun sos ballerinos chi ant a èssere acumpangiados dae su grupu musicale Indoamerica), su grupu de dantza pobulare Szarkaláb de Cluj-Napoca (Romania), s’ensemble de dantza Kostanay Zori e su complessu musicale Akzhelen bènnidos de su Kazakhstàn, sa Compania Integral de danzas especializadas de Bolìvia de Sa Paz, e sos meres de domo de su Grupu folk Tzitade de Assèmini.

Su fèstival, chi s’at a abèrrere giòvia 25 a Maracalagonis, cun sos grupos chi s’ant a ammustrare partinde dae sas 21.30 tra Piazza Crèsia e bia Giovanni XXIII, tenet s’amparu de su Ministeru de sos Benes e de sas Fainas Culturales, de sos Assessorados regionales a su Turismu e a su Pùblicu Imparu, in collaboratzione cun sa Federatzione Italiana Traditziones Populares, Iov Itàlia, sas comunas de Maracalagonis, Assèmini, Pula, Carluforti e Foghesu e sas Proloco de Pula e Foghesu.